Një situatë e krijuar mbrëmë në spektaklin Big Brother VIP Kosova, ku banorja Drenusha Latifi u përfshi në një debat të rëndë për shkak të sulmeve që lidhen me babain e saj, ka nxitur reagime të shumta në opinionin publik dhe rrjetet sociale. Në statusin e tij, Milaim Zeka kritikoi ashpër ata që përdorin platformat sociale për të gjykuar e sulmuar personazhet publike dhe përfshirjen e figurave politike në diskutime të tilla.
Zeka, i njohur për qasjen e tij të drejtpërdrejtë dhe shpesh herë polemizuese, i ka quajtur sulmet në adresë të Drenushës si një lloj “gjykimi patriotik” të padenjë për kontekstin e një reality show. Ai theksoi se Big Brother VIP nuk është një gjykatore dhe se debati mbi të kaluarën apo veprimet e individëve nuk duhet të bartet në një format televiziv që ka natyrë argëtuese.
Në statusin e tij, ai shkroi:
“Për bashkëpunëtorë të regjimit, për prokurorë, gjykatës e spiunë kam folur në media, në foltoren e Kuvendit të Kosovës. Pyeteni Hashim Thaçin se pse e bëri këshilltar Tom Gashin? Pyeteni Azem Sylën, Sylejman Selimin e plot të tjerë, pse e merrnin Tomën si avokat? Pyeteni Ramushin, Kadrin, Fatmirin, gjithë krahun e luftës, pse i futën nëpër institucione dhe i rehabilituan?”
Duke iu drejtuar atyre që ai i quan “patriotë të Facebook-ut,” Zeka kritikoi ata që bëjnë “gjyq publik” duke u bazuar në fakte të pamatura dhe shpesh herë të deformuara. Ai shtoi:
“Me mua nuk ju ecë. Nuk ju ka ecë atyre që i përmenda, e le më juve, që sarrakuqeni nëpër Facebook!”
Reagimi i Zekës thekson gjithashtu mungesën e profesionalizmit dhe objektivitetit në trajtimin e çështjeve të ndjeshme, duke i konsideruar sulmet personale si një formë të analfabetizmit kulturor.
Ai e përfundoi statusin me ironi, duke thënë:
“BB nuk është gjykatore. Është krejt diçka tjetër. Ju vazhdoni edhe më mbani pak leksione patriotike, se kënaqem diqysh. Kënaqem kur analfabeti m’i tregon shkronjat, ma mëson leximin…!!!”
Reagimi i Milaim Zekës ka nxitur diskutime të mëdha në rrjetet sociale, ku përdoruesit janë ndarë mes atyre që mbështesin qëndrimin e tij dhe të tjerëve që e konsiderojnë reagimin si të tepruar.
Megjithatë, një gjë mbetet e qartë: polemikat në Big Brother VIP Kosova vazhdojnë të nxisin debate përtej mureve të shtëpisë, duke u shndërruar në çështje të diskutuara gjerësisht në opinionin publik.
