Ditë e re, nafakë që dihet – Albulena Haxhiu sot thirret si emër sërish nga Vetëvendosje për Kryetare të Kuvendit, pa pasur asnjë ndryshim numerik në fatin e përzgjedhjes së saj.
Sot vazhdon seanca konstitutive e Kuvendit të Kosovës nga ora 10:00, ndërsa palët s’kanë lëvizur as një gorhs nga qëndrimet e etabluara.
Vetëvendosja s’e heq emrin e Haxhiut, anipse s’i ka votat – partitë tjera politike kërkojnë heqjen e emrit të saj nga propozimi për Kryetar të Kuvendit.
Aleanca për Ardhmërinë e Kosovës është shprehur e vullnetshme për tjera emra nga radhët e VV-së, emra më të pranueshëm si Shqipe Selimi apo Saranda Bogujevci.
Partia Demokratike e Kosovës, po ashtu, kaherë ka lënë të kuptohet se do të mund të votonte për ndokë nga Vetëvendosje që është më i pranueshëm – i.e Memli Krasniqi s’e pati përjashtuar se do ta votonin Glauk Konjufcën për Kryetar Kuvendi.
Lidhja Demokratike e Kosovës në terma të plotë refuzues, ka thënë se asnjë kandidat nga Vetëvendosje për ta s’është i pranueshëm dhe se rrjedhimisht s’kanë votë për ta.
Nisma Socialdemokrate, e cila supozohet të jetë as-as, edhe-edhe, për Vetëvendosjen – ka abstenuar me tri votat e saj karshi Albulena Haxhiut – çka është raportuar pafund se vetë Fatmir Limaj synon postin e kryeparlamentarit.
Por, Limaj u shfaq të ndërrojë diskurs para dy ditësh kur tha se duket qartazi se VV “nuk i ka numrat” dhe se në këto rrethana “duhet të lëshojë rrugë”.
Nga Vetëvendosje, për synimet e Limajt për kryeparlamentar, kanë thënë se “ka marrë fund ajo punë”, kur është propozuar emri i Haxhiut.
Mefail Bajqinovci nga VV tha ditë më parë në “Kanal 10” se për një koalicion eventual me Nisman mund të ketë aranzhime ministrore, por se nuk bëhet fjalë për postin e udhëheqjes së legjislativit.
Në anën tjetër, Vetëvendosja e pa numra, kërkon nga opozita “të reflektojë” dhe t’ua votojnë propozimin e tyre: Albulena Haxhiun.
Kryetari i Vetëvendosjes, Albin Kurti, nuk deklarohet që kohë për media duke çarë mespërmes gazetarëve pa përgjigje nëse mund të ndërtojë shumicë parlamentare.
