Deputetja e Lidhjes Demokratike të Kosovës (LDK), Hykmete Bajrami, ka deklaruar sot pas përfundimit të seancës së Kuvendit se partia e saj nuk do të mbështesë Albulena Haxhiun, e gjithashtu për asnjë kandidat tjetër të propozuar nga Lëvizja Vetëvendosje për kryetar të Kuvendit.
Në një deklaratë për media, Bajrami citoi Albert Einsteinin duke thënë: “Është çmenduri të përsëritësh të njëjtin veprim dhe të presësh rezultat ndryshe,” duke kritikuar kështu tentimet e njëpasnjëshme të Vetëvendosjes për të zgjedhur kryetarin pa arritur marrëveshje më të gjera politike.
“LDK nuk ka votë për Albulena Haxhiun dhe as për ndonjë kandidat tjetër të Vetëvendosjes. Përgjegjësia për zhbllokimin e kësaj situate është plotësisht e Vetëvendosjes,” theksoi Bajrami, duke shtuar se partia që ajo përfaqëson nuk është e interesuar të qeverisë në asnjë formë me Vetëvendosjen.
